Четверг , 4-Март 2021
Башкы бет / Жаңылыктар / Алмакан аттуу айым эмне үчүн орундугун бекем кармап, жабышып алганын айтып берди

Алмакан аттуу айым эмне үчүн орундугун бекем кармап, жабышып алганын айтып берди

Буга чейин Бишкек шаардык мэриясы “Ош базарынын” ичиндеги мыйзамсыз соода-сатык иштерин тартипке келтирүүнү улантып жатканын кабарлаган. 10-февралда мэриянын тийиштүү кызматкерлери базар ичинде мыйзамсыз соода жүргүзүп жаткан соодагерлердин орундуктарын алышкан. Ал эми соодагерлер буга каршы болушкан. Ага улай эле интернет түйүндөрүндө жумуш ордун коргогон аял кишинин видеосу (анда ал милиция кызматкерлери анын орундугун алып жатканда каршылык көрсөтүп, орундугуна чапталып, жабышып алганы көрүнөт) тарап, көпчүлүктүн талкуусуна жем таштаган.

Жогорудагы талкууга жем таштаган Алмакан аттуу айым эмне үчүн орундугун бекем кармап, жабышып алганын айтып берди. Анын айтымында, жолдошу каза болуп калгандан бери жалгыз 2 баланы тарбиялап келет. Багууга чамасы жетпегендиктен бирин ата-энесине берип койгон.

“Менин эки балам бар. “Ош базарында” 7 жылдан бери иштеп келе жатам. Эптеп араба түртүп, товарларымды сатам. Бир аз сатып, беш-он сомумду алып үйгө барам. Ден соолугум начар. Башым ооруйт. Дегеле оорубаган жерим калбады. Эки-үч күндөн бери ишке чыкпай отургам. Арабамды алып, мени кууп жатат. Алмамды сатып түгөтүп коёюн деп отургам. Эми чыкпай эле коёюн десем деле болбой арабамды алып койду. Бош столду талашып алып коюшту. Жакында байкем, эжем каза болгон. Ушундай кайгырып, жашоого дагы маанай жок. Эптеп кирип-чыгып жүрсөм столумду жүктөп кетти. Адам өз башына оор жүк келгенде акылынан кетет экен. Мага эч кимден жардам жок (ыйлады). Кечээ социалдык тармакта тарап, талкуу болуп жаткан видео жөнүндө мага Орусиядан тааныштарым айтышты.
“Алмакан, сенин видеоң Орусиядан чыгып жатат” дешти. Телефонду дагы жакшы караганды билбейм. Баламды жалгыз таштай албай ээрчитип келип, кайра ээрчитип кетем.
Балам “бутума суу өтүп кетти” десе дагы, “тура бер балам, жаның тынч болсо болду” дейм. Жолдошум 2010-жылы каза болгон. 10 жылдан бери жалгыз жашайм. Балам 14 жашта, окуудан келгенде эле жаныма чакырып алам”, – деди Алмакан айым.

http://sonkukabarlar.kg/almakan-attuu-ajym-emne-%D2%AFch%D2%AFn-orundugun-bekem-karmap-zhabyshyp-alganyn-ajtyp-berdi/?fbclid=IwAR1brFzie_gyrMNxtvOOLaXcNE0gFLjJlsMIq6-HLxwdr7pUgLLuHLBPJ3E

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники
Опубликовать в Яндекс