• Ср. Ноя 30th, 2022

Популярные метки

Ф. Ниязовдун өз эрки менен кызматтан кетүү боюнча арыз жазуусуна эмне себеп болушу мүмкүн?

Автор:ruh_admin

Мар 3, 2018

Апта соболу

Исхак Масалиев,               Жогорку Кеңештин депутаты:

«Фарид кызматтан кетсе эч нерсе деле өзгөрбөйт, жаз да келди, гүлдөр ачылат»

— Эмне десек деле Сооронбай Шарипович абройлуу саясатчы, өзүнүн көз карашы бар. Акыркы учурларда Фарид өзүм билемдикке салган болушу мүмкүн. Жумуш мезгилинде Москвага барып, партиялык документтерге кол койгону бул мыйзамга туура келбейт. Коомчулукта болуп жаткан абалды президентке толук, калыстык менен жеткирбеши мүмкүн. Же кандайдыр бир саясий оюндарга аралашкан. Байкасаңар, ушул күндөрү “кnews” сайтында Сооронбай Шариповичке шек келтире турган чоң макала жарыяланды. Ошол жерде мурунку президент менен азыркы президенттин тиреши жөнүндө жазылып кеткен саясий оюндар бар болчу. Балким ал нерсеге ушул Фариддин тиешеси бардыр, мен билбейм. Бирок ал жөнөкөй аппараттын жетекчиси. Аппарат деген бул администрация, Конституциялык орган эмес. Президенттин ишмердүүлүгүн камсыз кыла турган орган. Ошондуктан ал кай жакка барат, ким менен жолугат, качан жолугат, эмне сүйлөйт дегендердин баарын даярдап берип, саясатка аралашпаш керек. Чарбалык жумушка киришпеши зарыл. Сооронбай Шарипович жыйырма эки жылдан бери саясатта деп жатпайбы, ичинде сырлары бар да. Фарид кызматтан кетсе эч нерсе деле өзгөрбөйт, жаз да келди, гүлдөр ачылат. Жаратылыш өз өкүмүн жүргүзө берет. Фарид саясатта барбы-жокпу айрымасы болбойт. Кыргыз элинин жашоосу улана берет. Ал эми саясатка Фарид кызматта отурабы, отурбайбы эч кандай тиешеси жок. Ал саясаттан алыстаса балким кээ бир жаман иштер токтоп калышы мүмкүн. Фариддин ишмердүүлүгүн карасак, ал комсомолдо жетекчи болуп иштеген. Бирок эгемендүүлүк жылдардан бери бир да жерде иштеген эмес. Же бир саясий ишмер же депутат болбогон. Анын тажрыйбасы жок. Балким башка сапаттары бардыр. Мен аны башка жагынан билем, 2010-жылы мени камакка олтургузганда, телевидениеге Фариддин колу менен менин сүйлөшүүлөрүмдү тыңшаган материалды алып барып берген. Мен аны билем, мага Атамбаев айтып берген. Демек ушундай жаман иштерге уста.

Рита Карасартова, укук коргоочу:

«Ниязовдун кетпей калышы, экс-президенттин таасири дагы деле күчүндө экендигин далилдегендей»

— Президенттин аппаратынын жетекчиси болгондон кийин, президенттин тегерегинде эмне болуп жатканына ушул киши жооп берет да. Ант берүү аземине деле өз кишилерин чогултуп, кийин СДПКнын атынан Россияга чейин учуп барып, “Единая Россия” менен келишим түзүп, Эсенгул Өмүралиев агай каза болгондо, некрологдо дагы С. Жээнбеков. А. Атамбаев деп жазып, (негизи бизде расмий бийликти жазып чыгыш керек болчу да) ошондой катачылыктарды кетиргенден кийин балким социалдык тармакта кысым жасаган үчүн кызматтан кетүүгө мажбур болду деп ишенгибиз келет. Бирок, президент анын арызын кабыл албай койгонуна байланыштуу, кандайдыр бир саясий оюн болуп калды го деп ойлойм. Элге эмнени билдиргиси келгенин билбейм. Башка саясатчылардан сурап бул эмнени билдирет десем, “мындай эч качан болгон эмес” деп айтып жатпайбы. Ошондуктан, бул ачык эле оюн болуп жатканы көрүнүп турат. Аркасында эмне турганы азыркы күнгө чейин белгисиз бойдон калууда. Кетип кала турган болсо, экс-президенттин тегерегиндеги кишилерден бошонуп жатат деген ойлор болмок. Фарид Ниязовдун кетпей калганы, бошонгонго дагы алыс бар го деген ойго кептеди. Ниязов кызматтан кетсе көп нерсе өзгөрүшү мүмкүн. Анткени, бул кишинин көп учурларда жан-жөөкөрлөрү шефим айтты деп сатып эле бир топ иштерди жасай беришет. Мен ойлойм, экс-президенттин тегерегинен эң таасирлүү, көп бурмаланган иштерди Фарид Ниязов жасачу деп ачык эле ойлойм. Эгер таза киши келсе, көрөгөч, даанышман мамлекет жөнүндө көп ойлонгон таза киши келди демекпиз. Анда кандайдыр бир демилге пайда болмок да. Биз мындайда коррупция менен күрөшүү, тазалануу деген көп сөздөрдү айтабыз. Бирок чындыгында ишке адисти алуу керек. Жумушка таза кишини алып келиш керек. Президенттин тегерегине ким келет, ар бир фигура маанилүү. Эгер мурун чуулгандуу иштерге аралашкан, соттолгон кишилер келе берсе, ошондон улам биз жыйынтык чыгара беребиз. Тынбастан өз демилгелерин ишке ашырганга, эл үчүн иштеп, эл менен биргеликте иш алып барса, эл ичинен демилге издесе ал чынында эле ушундай кишилер келиптир деп айтабыз. Фарид Ниязовдун калып калганы коомчулукка жакпады. Жарандык коомду дагы чукулап, булар деген агенттер, булар шпиондор деп, ошол жактан демилге келген. Бийликтеги салмактуу саясий фигураларга дагы буйрутма берген президенттин аппараты болгон. Биз жаңы президент шайланды, эми жаңылануу болот деп үмүттөндүк, бирок аппарат жетекчиси болуп мурунку кишилер келе баштагандан кийин кайрадан эле баягы үмүтүбүз солгундап калды. Ошондуктан, Фарид Ниязов кетип, таза, кыргыз үчүн күйгөн, артында чуулганы жок киши келсе биз кайра көзүбүздү жумуп туруп, президентибизди кош колдоп кубаттамакпыз. Мамлекетибиз кичинекей, кедей. Элибиздин көбү чет өлкөдө жүрөт. Эмнебизге чиренип, эмнени бөлүшүбүз керек? Ошондуктан бул саясий оюну мага жаккан жок. Элдер түшүнгөн жок, эмне болуп жатканын. Ниязовдун кетпей калышы экс-президенттин таасири дагы деле күчүндө экендигин далилдегендей. Ошонун карамагында эле калып, баланчанын президенти дегендей эле болуп жатат да. Ниязовдун башка кайсыл кызматка кеткени да маанилүү. Эгер такыр эле эч нерсе чечпеген кызматка барса, олтура берсин. Бирок бул кишинин кетпегени биз үчүн чоң сигнал болду.

Артур Медетбеков, генерал:

«Фарид Ниязов президенттин аппарат жетекчилигинен кетсе, кайра башка кызматка келбейт»

— Фарид Ниязовдун арыз жазып кетем деши бир четинен таң калыштуу болсо, экинчиден кандайдыр бир саясий оюнду чагылдырып турат. Себеп дегенде Фарид Ниязов азыр иш жактан кандайдыр бир басым көргөндөй болуп турат. Биринчиден, туруктуу президент жагынан, экинчиден президенттин тегерегиндеги аттуу-баштуу саясатчылар басым көргөзгөндөй. Үчүнчүдөн мурдагы президенттин дагы басымы көрүнгөндөй. Үч жактан басым көрсөтүлгөндүктөн бул киши бардык чыдамкайлыктан четке чыгып кетейин деген өзүнүн пикирин билгизиши мүмкүн. Же болбосо жөнөкөй эле саясий оюн. Элде болуп жаткан реакцияны байкоо. Саясий талаада кандай болот деп байкоо жүргүздү. Ошондон бир тыянак чыгаруу үчүн ошондой жагдайды чагылдырышы мүмкүн. Фарид Ниязов саясаттан кетсе мурдагы президенттин таасири анын басымдуулугу канчалык деңгээлде бүгүнкү бийликке таасирин тийгизет, бул дагы өзүнчө бир чоң суроо. Эгерде чындап айтканда Фарид Ниязов жумуштан кетсе, андан да жакшы, күчтүү, кыйын иштейм деген чабармандар толуп жүрөт. Эң негизгиси мурунку бийликтин учурунда иштеп, мурунку бийлик менен чогуу жүрүп, көз каранды болгондон кийин эки бийликтин ортосунда байланыш болуп калган. Менин жеке пикиримде бул киши президенттин аппарат жетекчилигинен кетсе, кайра бир башка кызматка келбейт. Ошол бойдон азыркы бийлик акырындан четтете баштайт.

Турсунбек Акун, укук коргоочу:

«Уят, Фарид таза адам, ага асылбаш керек»

— Мен анын арыз жазганын билген жокмун. Прессадан окудум. Арыз жазганда жанында турган жокмун. Эмне себептен экенин айта албайм. Менин божомолума караганда ачыгын айтуу керек, Фарид Ниязов катуу иштеди. Алты жыл мурунку президент менен иш алып барды. Ошол киши башында туруп иштеп чыккан стратегия ишке ашты. Алмаз Шаршенович ак жолтой болуп алты жыл татынакай иштеп берди. Эми кемчиликтер болду. Башка президенттерге салыштырмалуу качып кетпей, бийликти учуру келгенде өткөрүп берди. Мына ушунда Фариддин ролу чоң. Андан кийин жаңы президентти шайлоо убагында алты ай бою тынымсыз иштеди. Мен алган маалыматтар боюнча, кызы ооруп жүрөт деп угуп калдым. Ошол кызын дарылатып башка өлкөлөргө алып барып, үй-бүлөсүндө дагы маселе жаралып жатса керек да. Ар бир адамда эле көйгөй болот. Сооронбай Шарипович менен иштеше албай калгандан арыз жазган жери жок. Жеке проблемалары менен кетип жатат окшойт. Биз Фарид Ниязовду саясатчы болгонуна карабай, саясатчы катары кабыл албашыбыз керек. Биз аны президенттин аппарат башчысы гана катары көрүшүбүз керек. Аппарат башчы деген президенттин күндөлүк ишмердүүлүгүн ишке ашыра турган гана аппарат башчысы. Фарид жөнөкөй жигит. Четке чыкканды жактырбайт. Бул аябай чоң кадр. Бекеринен Сооронбай Шарипович иштен кетирбей койгон жери жок. Фариддин ордунда башка киши болсо эчак көөп кетмек. Учурда элдин асылганы эле Фарид. Уят, Фарид таза адам, ага асылбаш керек.

Суроо салган Альбина Калыкова

“Жаңы Ордо” гезити. №06 (579), 2-март, 2018-жыл

 

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники
Опубликовать в Яндекс